MIZO NAUPANGTE TAN
USA leh khawvel puma Mizote,
Chibai u. The MIZO (Mizo Social & Literary Journal, USA) chuan Mizo naupangte tan ‘Mizo Nau Awm/Nau Awih Hla’ (Mizo Nursery Rhymes) siam tumin hma a la mek a. May 2014 vela DVD peih fel tum a ni. Hei hi a bik takin, ram danga awm Mizo naupang – sei lian mekte leh lo la piang zel turte tan a tangkai a rinawm a, hma min lakpui turin Mizo zawng zawng kan sawm a. Hetiang lama mi thiamte leh a tui mite min sawm zaupui a, thawhpuia min sawmsak turin kan ngen a che u.
Siam tul nia kan hriat chhante:
- Nu leh pa tam takten hetiang lam hi siama hma la turin min ngen.
- Ram danga Mizo naupang tam tak hian sikul an rah hma hauh atangin Sap tawng hi an tuipuiin an thiam em em thin. A chhan ni bera lang chu an Nursery Rhymes tha leh hmuhnawm tak takte hi an tuipuiin an en nasa a, chumi atang chuan mahni tawng ai maha Sap tawng ngainat zawkna leh thiam zawkna an nei thin.
- “Nu leh pate mawh a ni. An mawhphurhna an hlen lo a ni,” tia insel ngawt hian, hmasawnna min thlen lo. Tan la tura kan infuih rualin a tih dan tur kan inzirtir a pawimawh a, tunlai hun mila hmanraw tha kan inchhawp chhuahsak a tul.
- Sap kan ngaihsan vang hrim hrim a ni lo a, Sap tih dan kan zir duh vang hrim hrim a ni lo. Tunlai kan hun tawngah, ram danga Mizo naupangte hian hetiang thil hi an mamawh vang zawk a ni.
Tawng zir tirte tana tangkai leh inzirtirna tha hla, a thluk nei chi emaw thluk nei lem lo chi emaw, uluk taka min ziahsaktu/phuahsaktu kan mamawh a. Tin, naupangten hmuhnawm an tih leh an tuipui em em Cartoon Animation lam thiam tak thawhpui tur kan mamawh. Naupangin sak nuam an tih tur hla thluk siam thiamte pawh kan mamawh bawk.
Kan tehfung turte:
- Naupang kum 5 hnuai lam tan a sang lutuk em?
- Zofa Kristiante tan a him tawk em?
- Inzirtirna tha a tling em?
- Mizo tawng zir nan a tlak em?
A hnuaiah hian hla/thu thupui tur kan thlan chhuah sate kan tarlang a, he’ng bakah mi thiamte leh a tui mite hnen atangin thupui tur rawtna kan dawng thei reng e. Hla/Thu hi 30 vel zet kan mamawh a ni.
Thupui thlan chhuah sate:
- Mizo A Aw B… (thluk nei & nei lo)
- Mizo tawng chhiar dan 1 & 2
- Mizo ka ni
- Ramsa hming
- Rawng (color)
- Mihring taksa bung hrang hrang
- Mizo number chhiar dan
- Ka nu ka pa ka lawm e
- Chawlhkar khat chhunga ni awmte
- Kan chhungkua
- Sikul kal ang
A thupui tur rawtna mai bakah, a thu (thluk nei tur chiin emaw nei lo tur chiin emaw) rawn thawh nghal theih a ni bawk.
Mizo naupangte tana The MIZO hmalakna denchhenin, kumin August thla hian Mizo hnam inpumkhatna lam, Mizo ziak leh chhiar leh Mizo thu leh hla lama hmasawnna tur lam hawi thu tha telna, The MIZO Vol.II No.2 (special issue) tihchhuah a ni ang.
Thurawn leh rawtna kan beisei reng e. He thil hi nakina keimahni min hruaitu tur kan naupangte tan a ni a, rilru min senpui turin, Mizo zawng zawngte hnenah pangchang takin kan ngen a ni.
The MIZO
Mizo Social & Literary Journal, USA
Email – mizoliteraryjournal@gmail.com
Website – www.mizoliteraryjournal.com
