USA Mizote kan inhmuh khawm theih hun pakhat Chapchar Kut chu remchangah lain, The MIZO chuan USA Mizo thu leh hlaa tui mite inhmuh khawmna hun tawi, Mizo Society of America program duan lawk loh hun chhungin (May 25, 2013, 6:00zn - 8:00zn), Pu Lalnunmawia inah a huaihawt a. He inhmuh khawmnaah hian Pu Hualsailova, Pu Zonunmawia Thlaute, Pu Vana Chawnghlut, Pu Lalnunmawia, Pi Lalhlimpuii, Pi Mamawii Hualngo, Lalchhanhima te kan kal khawm a, Pu Lalsawmate nupain hun tir lam min rawn hmanpui bawk.

        Sawm bik mi ṭhenkhat - Pu Chawngthangvunga, Pu Vanlalpekthara, Pu B. Zarzoliana, Pu Henry Vangchhia, Pu R. Lalchungnunga, Pu Victor Zika, Pu Lalrochhara leh Tv. Noel Lalthangliana te hnen aṭangin sawmna hmuh tlai avang te, Chapchar Kut-a mawhphurhna kal mek tihhlawhtlin ngei ṭulna avang te, chhungkaw inhmuh khawm pawimawhna avang te, zirlai exam neih mek avang tea an lo tel theih loh thu leh hunin rem tihpui sela lo tel ngei an duh thu, phatna ngaihṭhatthlak kan dawng bawk.

        Rokunga hla ‘Ro min relsak ang che’ kan sa a, Pu Vana Chawnghlut hun hlanin a ṭawngṭaia inkawmna leh sawi hona kan ṭan. USA-a Mizoten kan ṭawng vawng nung zel tura hma kan lak a ṭulzia te, Mizo thu leh hlaa tui mite thawh hona ṭha zawk kan neih zel theih dan tur te leh Mizo thu leh hla tihhmasawn theih dan tur kawng ṭha zawn ho zel a pawimawhziate kan sawi ho a. Mizo ṭhangtharte pawhin an tuipui tur leh kan ṭawng humhalhna atana hmanraw pawimawh tak ni tur Chanchinbu la tihchhuah theih ngei a chakawm thu leh a pawimawh thu pawh kan sawi nasa hle bawk a ni.

        Kal khawmten sawi hona hrang hrang kan neih hnuah, USA-a Mizo thu leh hla vawng nung zel tura hma latu atan leh thu leh hlaa tui mite thawh hona ṭha kan neih zel theih nan, “Central Mizo Society of America hian Literature & Culture Sub-Committee din thei se, din turin Central MSA Committee-ah rawtna siam nise” tiin thu kan titlu a, May 26, 2013 khan Central MSA-ah chu rawtna chu theh luh tawh a ni.

        Kal khawmte chuan Mizo thu leh hla chanchinbu The MIZO chu chak taka kal zel a, thu leh hlaa USA Mizote rilṭam hraipuartu ni turin duhsakna kan hlan bawk a ni. Rokunga hla ‘I hun i hmang ṭha em?’ kan sa a, Lalbiak ṭawngṭainain USA Mizo thu leh hlaa tui mite inhmuh khawm vawi khatna chu tihtawp a ni.